close
قصص

كنت بزور اختي في مره بعد ماتجوزت بحوالي خمس سنين !!!

كنت بزور اختي في مره بعد ماتجوزت بحوالي خمس سنين ، وكان أحمد جوزها في الشغل المهم قاعد معاها فقالتلي كمال قوم معايا هنروح عند الدكتور هكشف ونرجع فقولتلها تمام ماشي يلا ، فروحنا انا وهي ، المهم الدكتور كشف عليها وابتسم شويه كده وقالها مبروك انتي حامل ففرحت جدا

وفضلت تبكي من الفرحه لانها ماكنتش بتخلف وقالتلي وشك حلو جدا عليا ، المهم قالتلي يلا نمشي ، واحنا مروحين في الطريق قالتلي ماتعرفش حد اني حامل ولا حتي احمد جوزي عشان اولا اعملهالوا مفاجأة ثانيا عشان لو الحمل ماكملش مازعلهوش واشيله همي وحزن كبير ، فقولتلها ماشي المهم فضلت مخبيه عليه لحد الوقت المناسب وجه الوقت

المناسب وقالتله انا حامل ، ففرح جدا جدا وقالها ماتتحركيش من مكانك خالص انا هعملك كل حاجه وفرحانين جدا الاتنين وانا مبسوط جدا عشان الفرحه اللي في عيونهم دي ، المهم انا كنت بروحلهم كتير عشان دايما احمد جوز اختي بيسافر كتير،وبعد خمس شهور من الحمل اختي كلمتني قالتلي انا عايزاك ، تعلالي البيت وروحت وكان أحمد جوزها مسافر برضو فقالتلي هروح اعمل سونار

واشوف انا حامل في بنت ولا في ولد فروحت معاها والدكتور عملها السونار وطلعت حامل في ولد ففرحت جدا انا وهي وقالتلي هسميه ادم فقولتلها حلو جدا الاسم وقالتلي لما احمد يرجع من السفر هقولوا اني حامل في ولد فقولتلها تمام وبعد اربع ايام احمد رجع من السفر و اول ما اختي شافته قالتله انا عملت سونار وطلعت حامل في ولد فرح جدا وقالها طب تعالي نروح للدكتور تاني عشان نفسي

اشوفوا وهو بيتحرك فراحوا الاتنين مع بعض للدكتور ودخلوا فاحمد قال للدكتور عايزين نعمل سونار عشان عايز اشوف ابني وهو بيتحرك المهم الدكتور قالوا تمام فبيشوف بالسونار فقالوا حضرتك المادام حامل في بنت فاستغربوا الاتنين وبقوا في حاله دهشة وتوتر شديد المهم أحمد قال للدكتور مش هيا جت كشفت من اربع ايام وعملتلها سونار وقولتلها

حامل في ولد رد الدكتور وقاله حضرتك انا اول مره اشوف المدام وماعرفهاش قاله ازاي دي جت هنا هي وأخوها ، قاله حضرتك والله ماشوفتهاش قبل كده وانا اول مره اشوفكوا انتوا الاتنين فردت اختي وقالت للدكتور حضرتك هجيب اخويا يمكن تفتكر وهو شاهد اني جيت هنا وعملت سونار رد الدكتور ماشي خليه ييجي واشوفوا المهم رجعوا البيت

وتاني يوم رنوا عليا فرديت فقلولي تعالي معانا عند الدكتور فوافقت وقولتلهم ماشي المهم روحت معاهم للدكتور فبصلي وقال أنا ماعرفش الأستاذ ده وانا رديت قولت وانا اول مره اشوف الدكتور ده وماعرفهوش اختي فضلت تزعق وتقول انتوا بتكدبوا انتوا الاتنين وكلكوا متفقين عليا وانهارت من العياط وفجأة وقعت قدامنا واغمي عليها وشيلناها وروحنا

البيت ودخلناها الاوضة بتاعتها ونامت وخرجت انا وأحمد بره الاوضه وفضلت قاعد مندهش من كلام اختي فسألت احمد وقولتلوا هي ليه اختي قالت قدام الدكتور أنها كانت حامل في ولد ومش حامل في بنت وليه استغربت لما الدكتور قال انها حامل في بنت
وفجأة رد عليا احمد وقال

وفجأة …. رد عليا احمد وقال مين قالك اني اختك حامل اصلا فاستغربت وبقولوا مش احنا لسه جايين من عند الدكتور انا وانت واختي والدكتور قالنا انها حامل في بنت مش ولد رد احمد عليا وقالي دكتور ايه واختك مين قولتله ماتهزرش ياحمد رد عليا وقالي مش بهزر علي فكره انا

بتكلم جد اختك مين ودكتور مين قولتلوا اختي اللي نايمه جوه في الاوضه ودايخه بسبب كلام الدكتور قالي مافيش حد في الاوضه قولتله لا اختي جوه قالي تعالي نشوف فقومت معاه وفتحت الاوضه ومالقيتش حد في الاوضه قولتله ازاي ده والله اختي كانت هنا والدكتور قال انها

حامل في بنت قالي دكتور مين وفين الدكتور ده قولتله تعالي معايا هوريهولك المهم روحت انا وهو عند الدكتور ودخلنا للدكتور وقولتله يادكتور حضرتك مش احنا كنا عندك انهاردة انا وأحمد واختي وقولت لأختي انها حامل في بنت ، رد الدكتور عليا قالي انا اول مره اشوفكوا وبعدين انا لسه فاتح العيادة من نص ساعه وكنت مسافر ولسه راجع وانتوا اول ناس تدخلوا دلوقتي

وماشوفتكوش قبل كده فزعقت مع الدكتور وأحمد وقولتلهم انتوا كدابين وعايزين تجننوني وجالي حاله من الصدمه والانهيار والعصبيه وأحمد خدني وروحنا البيت عنده وقولتله انتوا ليه بتكدبوا عليا وبتقولوا اني اختي مش حامل والدكتور قال أنه ماشفنيش قبل كده فرد عليا احمد وقالي ياكمال احنا مش بنكدب عليك وانت فعلا

اختك مش موجودة انت اختك ميته من خمس سنين في حادثه بالعربية وهي راحه تعمل سونار عند الدكتور وكانت نفسها لو بنت تسميها فريدة ولو ولد تسميه ادم وانت من ساعتها في الحاله دي و كل يوم تتخيل اختك وعقلك

يتخيل الدكتور ويتخيل فريده وادم وكل يوم تحصل معاك نفس القصة ويجيلك حاله اغماء وتنام وتحلم بنفس الأحداث وكل شويه تتخيل انها حامل في بنت مره وفي ولد مره.
انتهت

مقالات ذات صلة

زر الذهاب إلى الأعلى