اختفاء مريب .. الجزء الأول
صحيت الصبح على مصيبة كبيرة أوي بناتي التلاته اختفم من البيت دورت عليهم في كل حتة مش موجودين . رنيت على تليفوناتهم لكن لقيت كل التليفونات مغلقة.
كنت هتجنن مش عارفه اعمل ايه. الساعة سبعة الصبح ياترى هيكونوا راحوا فين وهما أصلا مش متعودين يخرجوا من البيت غير أما يعرفوني هيروحوا فين .
وكمان مفيش أي ملابس ناقصة غير البيجامات اللي كانوا نايمين بيها .لا مش هينفع أفضل قاعدة كده ودماغي عمالة تودي وتجيب لازم أتحرك واعمل أي حاجة.
فكرت إني أتصل برفعت جوزى اكيد هو اللي هيكون عنده حل للموضوع ده هو بايت فى الشغل من إمبارح لأنه بيبات في الشغل كل خميس وجمعة وده عشان يوفرلنا فلوس
زيادة أنا وبناتي اللي هما أصلا مش بناته لكن الصراحة كان دايما بيعاملهم أحسن معاملة وعمره ما حسسهم إنه هو جوز امهم مش ابوهم .
أنا اتجوزت رفعت بعد ما جوزي مات بتلات سنين مقدرتش اشيل حمل التلات بنات دول لوحدي الحمل كان تقيل عليا أوي وخصوصاً إن جوزي مات وأنا صغيرة .
عشت أنا والبنات ورفعت وكنا سعداء جداً لحد ما كبروا وأصبحوا آنسات علي وش جواز. وبدل ما كنت المفروض أفرح بيهم شكلي هموت بحسرتي عليهم بعد ما اختفوا بالشكل الغريب ده.
اتصلت برفعت وحكيتله اللى حصل. ومكنش قادر يفهم إزاي يعني تلات بنات كبار يختفوا كده من البيت . طلب مني إني أهدي واروح أبلغ الشرطة وهو هيحاول يستأذن بدري من الشغل و يجي يشوف المصيبة دي حصلت ازاي.
روحت أقرب قسم شرطة وبلغت عن اللي حصل لكنهم رفضوا يعملوا محضر إلا بعد ما يمر أربعة وعشرين ساعة على حالة الاختفاء. ابتدت الدنيا تضلم في وشي وحسيت كأني تايهة ومش عارفه إيه اللي بيحصلي ده معقول قصرت مع بناتي لدرجة أنهم يختفوا كده ومحدش يعرف إيه اللي حصلهم.
ابتدأ الجيران يوصلهم الخبر وفي ناس منهم جت عشان تساندي وتقف جنبى لكن كل ده من غير فائدة. وخصوصاً إن كل اللي بيدخل لازم يسمع الحكاية من أولها ومحدش بيصدق حتى اللي بحكيه . إزاي تلات بنات كبار يختفوا كده من بيتهم بكل سهولة .
ده لو سحر مش هيبقي بالشكل ده . وابتدا الناس يقولوا كلام غريب زي ممكن يكون جني أو شيطان اخدهم تحت الأرض و بالشكل ده عمرنا ما هنوصلهم ودي الحاجة الوحيدة التي تفسر إنهم إزاي يختفوا كده في لمح البصر ومنغير أي إشارة أو إنذار..
ابتديت أبكي واصرخ وأنا مش مستحملة كلامهم ده والناس تحاول تسكتني أنا عايزة حل عايزة حتى لو إشارة تطمني إن البنات بخير .العصر إذن وأنا لسة قاعدة حاطة ايدي على خدي ودماغي وقفت من كتر التفكير وفجأة
تليفون البيت رن جريت بسرعة ورفعت السماعة رد عليا وأحد بصوت غريب مقدرتش احدده .وقال متخافيش بناتك معانا اسمعي اللي هيطلب منك ومتعمليش شوشرة ولا تبلغي الشرطة والبنات
هيرجعوا ولو عملتي عكس كده هبعتلك جثث التلات بنات متقطعين وقفل السكة قبل ما الحق أقله أي حاجة.
مكنتش عارفه أفرح عشان عرفت إني بناتي عايشين الحمد لله ولا ازعل عشان مخطوفين والله أعلم اللي خاطفهم ده ناوي يعمل فيهم إيه بعد ساعة لقيت…يتبع
تليفون البيت رن جريت بسرعة ورفعت السماعة رد عليا وأحد بصوت غريب مقدرتش احدده .وقال متخافيش بناتك معانا اسمعي اللي هيطلب منك
ومتعمليش شوشرة ولا تبلغي الشرطة والبنات هيرجعوا ولو عملتي عكس كده هبعتلك جثث التلات بنات متقطعين وقفل السكة قبل ما الحق أقله أي حاجة.
مكنتش عارفه أفرح عشان عرفت إني بناتي عايشين الحمد لله ولا ازعل عشان مخطوفين والله أعلم اللي خاطفهم ده ناوي يعمل فيهم إيه.
بعد ساعة لقيت رفعت جوزي داخل عليا وكان مصدوم و باين عليه الزعل أوي والتعب والإنهاك ولكنه كان عايز يطمن علي البنات أهم حاجة.. فضل يسألني إيه اللي حصل اوي تكوني
زعلتيهم يا وفاء أوعي يكونوا طلبوا حاجة ومعملتيهاش عشان كده زعلوا ومشيوا . ابتديت اهديهم واحكيله إللي حصل من أول ما صحيت لحد مكالمة التليفون اللي جتني من شوية .
وهنا قالي طب خلاص إحنا لازم ننفذ اللي الراجل ده قال عليه بالحرف عشان البنات يرجعوا لينا بالسلامة . وسألني هو طلب فلوس ولا مطلبش؟
قولتله لا مطلبش ومقلش تفاصيل كتير في المكالمة وقفل السكة بسرعة..قعدت أنا ورفعت نحاول نربط الخيوط ببعض يمكن نوصل لاي حاجة لكن مقدرناش
نوصل لحاجة خالص .وهنا جه علي بالي سؤال مهم لو طلبوا مننا فلوس هنعمل إيه؟ قعدت أفكر مع نفسي شوية ولما ملقتش حل قلت السؤال ده لرفعت.
رد متخافيش هتصرف هستلف هطلب سلفة من الشركة هعمل أي حاجة عشان البنات يرجعوا لنا بالسلامه. فضلنا مستنيين والقلق هيموتنا ومفيش في أيدينا أي حاجة نعملها .
وعدي يوم والتاني ومفيش لا حس ولا خبر جوزي بيفضل قاعد معايا لحد ما يتخنق من الناس اللي كل شوية ييجوا يسألوا عملنا إيه . فا بينزل يتمشى شوية وبفضل أنا قاعدة أبكي وادعي إن ربنا يرجعلي بناتي .
عدي أسبوع ولسة مفيش أي حاجة حصلت لا الراجل أتصل ولا جاتنا اي إشارة من عنده تطمنا علي البنات . كان البيت مليان ناس وأنا قاعدة وسطهم لقيت الباب بيخبط
فتحت اشوف مين.لقيت بناتي التلاتة داخلين عليا وكانت حالتهم صعبة أوي كانوا لابسين بيجامات النوم بتاعتهم وكانت متقطعة ومبهدلين على الآخر وفي تعويرات
كتير علي أجسامهم وكان مرهقين جداً وعيونهم باين عليها إنهم كان بيعيطوا كتير أوي. أيديهم ورجليهم عليها علامات حبال وفي دم كتير بينزل منهم .
فضلنا نسندهم لحد ما دخلناهم اوضهم . حاولنا نسألهم عن أي حاجة ولكن مفيش كلهم ساكتين مفيش اي واحدة منهم قادرة تتكلم.. بعد حوالي ساعتين قلت لازم اجيب لهم دكتور
عشان اطمن عليهم. وطلبت من واحد من الجيران أنه يطلب لنا دكتور كويس. أول ما البنات سمعوا الكلام ده . قامت واحدة منهم من علي سريرها قدرت تتكلم أخيراً وقالت لي .أمي خرجي كل الناس دي وتعالي عشان في حاجة مهمة لازم تعرفيها…
