شبح حماتي الجزء الثاني
بعد ما سمعت الكلمتين اللي قالتهم مدام رشا حسيت اني مش متزن ، بدأت أراجع كل تصرفات حماتي الغير مفهومة اللي كنت بشوفها في الكام يوم اللي فاتوا ، دي كانت حابسة نفسها في الأوضة تماما من غير اكل ولا شرب ، مراتي كانت بتقول انها اكيد جايبة اكلها معاها ، بس انا لما دخلت الأوضة وفتشت في حاجاتها ملقيتش اي أكل ، مفيش إنسان في الدنيا يقدر يعيش المدة دي كلها من غير أكل ..
بس انا برضو مشوفتش أموات بتتكلم قبل كدا ..
بدأت أتذكر الظروف اللي اتعرفت فيها على مراتي ..
انا مكنتش اعرفها كويس ، مكنتش اعرفها خالص ، اللي حصل اني كنت سايق في يوم عربيتي ورايح الشغل وكنت نازل متأخر فكنت مستعجل شوية ، خبطت واحدة بالعربية وخدتها وديتها المستشفى ، هي دراعها اتكسر بس محصلهاش اي حاجة اكتر من كدا ..
بعدها زورتها اكتر من مرة علشان اطمن عليها وهناك اتعرفت على مامتها كانت ست غامضة فعلا ، كلامها قليل جدا ، ونظرتها غريبة ، فيها قوة كدا مش مفهومة ، انا مكنتش برتاحلها من اول ما شوفتها ، بس حبيت بنتها واتخطبنا 6 شهور وبعد كدا اتجوزنا ، مكنتش اعرف اي حد من اهل مراتي غير أمها بس ..
ودلوقتي انا لازم اتأكد من حكاية الجماجم دي واعرف هل فعلا اللي انا فهمته كان صح وللا انا كنت غلطان ..
وانا في الطريق اتصلت بعم حسين الغفير اللي كان بيحرس مقابر عيلة أمي وطلبت منه يجهز مفاتح المقابر لأني مش مطمن عشان فيه ناس بتسرق جماجم الاموات وبيطحنوها وبيستخدموها في تصنيع نوع من المخدرات ..
طب دا أي كلام بس انا كنت محتاج سبب مقنع اقوله للراجل وأنا جاي أفتح مقابر عيلة أمي بعد المدة دي كلها ..
بدأت بالمدفن بتاع والدتي ، عم حسين فتحلي ونزلت القبر تحت واتفاجئت ان الكفن كان مفتوح وكل اللي جواه عامود فقري مقطوعة منه الراس ..?
ودا نفس اللي لقيته في قبر خالي وجوز خالتي ..
ال 3 جماجم مكانوش موجودين في مكانهم لإنهم ببساطة موجودين في مكان تاني .. عندي في البيت ..
روحت في اليوم دا وانا مصمم افهم اللي بيحصل ، بس قررت ما اكونش لوحدي ..
كلمت واحد صاحبي اسمه كريلس كان لسه راجع من امريكا بقاله أسبوعين بالظبط ..
كريلس كان الوحيد من اصحابي اللي مهتم بالظواهر الغريبة اللي زي تناسخ الارواح والسحر الأسود والحكايات دي كلها وكان بيعمل أبحاث كتير في المجال ده ..
اتصلت بيه في التليفون وحكيتله القصة كلها ..
كريلس قالي ان فيه منظمة ظهرت في امريكا من حوالي عشر سنين كل أعضاءها بيعبدوا الشيطان وبيقدموا ليه قرابين بشرية والأمر بيوصل انهم بينتحروا والشيطان بيسكن أجسادهم علشان يمنحهم الخلود ، وبيعيشوا وسط الناس علشان يحققوا اهداف لوسيفر ، إلههم اللي بيعبدوه ..
وحكاية الجماجم اللي حماتي بتستخدمها دي فدا طقس كان بيحصل برضو في امريكا مع أعضاء الجمعية دي ضمن طقوس استدعاء أرواح الموتى وتسخيرها ..
قولتله بس كل دا في امريكا مش في مصر ..
قالي مش بعيد يكون فيه ناس بتمارس النشاط دا في مصر وتكون حماتي واحدة من الناس دي ..
اتفقت مع كريلس اني هروح البيت وهو يحصلني بعد شوية كإنه جاي يزورني وهحاول اشوف طريقة تانية تخلي حماتي تخرج من اوضتها بحيث انه يقدر يشوف كل حاجة بعينه ..
روحت البيت .. مراتي كانت مستنياني على الغدا كالعادة ، والغريبة ان حماتي كمان كانت قاعدة معاها على غير العادة ومستنياني برا اوضتها .. لما دخلت البيت حماتي طلبت من مراتي تسيبنا شوية لوحدنا ، طبعا هي منفذتش الطلب دا بسهولة لأنها مكانتش فاهماه ، بس في النهاية دخلت جوا وسابتني مع مامتها ، وبدأت حماتي تتكلم ..
– مبقاش ينفع نخبي على بعض دلوقتي ، انت عرفت كل حاجة وعرفت انا مين بس انت اكيد متعرفش انا هنا بعمل ايه ، ولا عرفت حكاية الجماجم اللي لقيتها في اوضتي ، انا هفهمك كل حاجة ، انا لوسيفر ، حامل الشعلة المقدسة ، انا فيه ناس معايا من آلاف السنين ، وعايش جوا أجساد ناس كتير انت بتشوفهم وبتتعامل معاهم وانت متعرفش انهم أموات وانا اللي بحركهم ، انا موجود في العالم علشان احرر سكانه من الموت ، اوهبهم الخلود الأبدي ..
امك هي و 10 أشخاص تانيين من ضمنهم أخوها وجوز أختها كانوا أعضاء منظمة سرية اسمها منظمة ال 11 أخ ، المنظمة دي كانت بتحارب عبدة الشيطان في مصر وبتحرض الناس ضدنا ، وانا كنت لازم أكسب حربي في النهاية ، والجماجم انا بستخدمها في تحضير أرواح أصحابها ، احنا دلوقتي عندنا جيش من الأرواح مجندين لخدمة أهدافنا ..
وانا موجود هنا في العمارة لان العمارة دي اتبنت فوق قبر واحد مهم جدا مننا على مر التاريخ ، الراجل ده مات من 450 سنة .. وروحه مبتحضرش غير في المكان اللي عضمه مدفون فيه ..
دلوقتي انت فهمت كل حاجة وعرفت الحقيقة ، وقدامك اختيار من اتنين ، يا تكون معايه يا تكون ضدي ، لو بقيت معايه هتعيش للأبد ، ولو بقيت ضدي هتدوق كل اصناف العذاب ، هحول حياتك لجحيم ..
وفجأة الشقة كلها اتملت تعابين ..
تعابين ضخمة بتخرج من كل مكان ، اتفزعت وحاولت أجري ، لكن فجأة التعابين كلها اختفت ..
قالتلي دي عينة بسيطة من اللي اقدر اعمله فيك ..
قبل ما اسيب البيت دا وامشي لازم اخد روحك معايه ، هتختار الطريقة اللي تعجبك وتنتحر بيها وبعدها روحك هتكون ملكي ، وإلا ، مش هتقدر تتخيل ايه اللي هيحصلك ..
قالت كدا ودخلت الأوضة وقفلت على نفسها ..
جرس الباب رن ، كنت قاعد مكاني كإني اتلزقت في الكرسي ، مش قادر استوعب اللي سمعته ..
مراتي خرجت ، قالتلي ايه يا محمد ، مش سامع الجرس بيرن ، مردتش عليها ، خرجت فتحت الباب كان كيرلس اللي جايلي حسب الاتفاق اللي بينا ..
مراتي دخلته الريسبشن ورجعت تاني المطبخ ..
لقيته مخضوض وبيقولي
– محمد ، يالا نمشي من هنا فورا
= فيه ايه يا كريلس
– تعالى بس هوريك حاجة بس لازم تشوفها برا مينفعش هنا ..
نزلت معاه ، روحنا القهوة اللي قدام البيت ، كانت شبه فاضية بالنهار
– ها يا كريلس ، حاجة ايه اللي هتوريهالي
= بص يا محمد ، انا كنت شغال في امريكا في الصحافة ، كنت بكتب في مجلة روحانية كدا اسمها the souls world ، مجلة الكترونية بتتنشر على النت ..
وكنت عامل تقرير صحفي عن جماعة من بتوع عبادة الشيطان اللي كلمتك عنهم دول ، فيه مجموعة انتحروا انتحار جماعي وسط طقوس غريبة كدا عشان يوهبوا روحهم للشيطان ، والجلسة دي كلها كانت متصورة فيديو وانا يومها نشرت الفيديو مع الخبر ..
ضمن الجماعة اللي انتحروا دول اتنين مصريين ، ام وبنتها ..
شوف كدا الصورة دي يا محمد ، دي صورة البنت وأمها ، البنت دي هي اللي فتحتلي الباب لما جيت عندك البيت .. هي كمان ميتة ..
= مش ممكن ، دي مراتي وحماتي
تمام جدا ، يعني مراتي ميتة ، وحماتي ميتة ، وهما الاتنين ساكن جسمهم شيطان ، دا انا طلعت عايش في فيلم رعب وانا مش حاسس ..
كريلس قالي أنت لازم تسيب البيت ده وتهرب فورا ، سافر ، روح اي حتة ، انت مش قد اللي انت داخل عليه ..
= و لما اهرب يعني يا عم كريلس ، هاروح منهم فين ، هيقدروا يجيبوني من أي مكان هروحه
– صح ، عندك حق ، يبقى مفيش غير حل واحد ، بس صعب ، صعب أوي يا محمد ..
= حل ايه يا عم كريلس اتكلم انا في عرضك
– انت تدخل معاهم الحرب
= نعم ؟
– أيوه ، اسمع مني مقدامكش اختيارات تانية ، انت لازم تحاربهم ، وتكسبهم كمان
= ازاي بقى ، احاربهم ازاي
– بص ، الجمعيات اللي بتمارس طقوس عبادة الشيطان وتحضير الأرواح والكلام دا موجودة من زمان اوي ، صحيح هما ما اتشهروش غير قريب بس دا عشان الانترنت والصحافة ، لكن هما كانوا موجودين من قبل كدا بقرون وليهم تاريخ طويل اسألني أنا عنه ، فيه راجل شيخ من عندكم اسمه الشيخ أبو المنصور الفاتح ، تسمع عنه
= لا ، انا لا اعرف ابو منصور الفاتح ولا أبو منصور الغامق ، بيعمل ايه دا
– دا بقى أشهر واحد حارب عبادة الشيطان ، الراجل ده كان باحث في علم الحروف ، انت عارف كل حرف ليه قوة وطاقة معينة ، اللي درس علم الحروف ده يقدر يعمل المعجزات
= ايه شغل الجلا جلا دا يا كريلس ، انت أمريكا علمتك العبط وللا ايه
– يعني انت بعد كل اللي حصلك دا لسه مآمنتش ان دا علم
= طب قولي اعمل ايه يا كريلس ..
– الحل زي ما قولتلك عند ابو المنصور
= طب يالا بينا نروحله
– هو مين دا اللي نروحله
= ابو منصور دا
– تروحله فين دا ميت من 600 سنة
= الله يحرقك يا اخي ، و لما هو ميت بتقولي ليه ان الحل عنده ..
– ما احنا هنحضر روحه
= نعم يا اخويا ؟
– اسمع الكلام قولتلك ، دي حرب أرواح ، وأبو المنصور دا روحه قوية جدا ، ولوسيفر مبيخافش من حد قده ، انا حضرت جلسات كتير في امريكا كانوا بيحضروا فيها روحه عشان يفكوا السحر الأسود والمس السفلي ، مفيش حل غير أن ابو المنصور يحضر في بيتك ..
= طب دي هعملها ازاي ، هحضر روحه ازاي في البيت وسط الشياطين اللي فيه
– انا هقولك ، بس اسمع الكلام دا وركز فيه كويس اوي ، وتنفذه أول ما تروح ..
وسمعت اللي كريلس قالهولي ، وروحت البيت ..
اول ما دخلت البيت قلبي اتقبض ، البيت اتحول لمتحف من متاحف الشيطان ، إضاءة نيون حمرا ، وشمع اسود في كل مكان في الشقة ، وكفوف دم مرسومة على الحيطان ، بأحجام مختلفة ، كفوف أطفال وكفوف كبار ..
وجماجم متعلقة في السقف ..
ومراتي قابلتني لأول مرة بوشها الحقيقي ، كان شكلها كريه جدا وانيابها بارزة وعينيها حمرا ..
وحماتي كانت شبه الساحرة الشريرة اللي بيحكوا عنها في حكايات الف ليلة وليلة ..
قولتلهم…… يتبع
