رواية القطة الجزء الأول بقلم مجهول

انا اسمي شهاب وعاوز احكي لكم حكايتي عمرى ٢٥ سنه شاب متخرج من كلية تجاره وزى اي شاب مدخلتش جيش لاني وحيد ووالدي ووالدتي توفاهم الله وانا عايش لوحدي

في شقتي في عماره مكونه من ٦ شقق كل دور شقه كلهم ساكنين أسر اللي متجوز ومعاه أولاده واللي مطلق وعايش هو وأولاده برده وانا مكانش ليا اختلاط كتير بالناس

اكتر من السلام ولو في اي حاجه تخص العماره والشقه بحكم شغلي كنت شغال في هايبر ماركت كاشير بصحي الصبح أفطر والبس هدومي وأخرج علي شغلي حياتي

كانت طبيعيه ومكانش في اي جديد وكان شغلي قريب من البيت يعني مسافة ١٠ دقائق مشي وكنت راجع من شغلي في يوم بالليل حوالي الساعه ١٠ وكنت جعان لاني

مكنتش أكلت حاجه طول النهار فا عديت علي مطعم بتاع فول وطعميه وجبت من هناك سندوتشات وقولت هتعشي بيهم وانا مكمل مشوارى في طريق علي غير عادتي

اني امشي فيه لقيت قطه لونها ابيض بتطلع صوت وباين عليها الجوع الصراحه صعبت عليا اوى وتردد في ودني مقولة ارحموا من في الارض يرحمكوا من في السماء

فا طلعت سندوتش وادتهولها ومشيت وكانت بتاكل فيه بنهم وجوع وشوفت نظرة رضا وشكر في عيونها وقولت الحمد لله اني حسيت بيها وكملت طريقي وروحت دخلت

شقتي واتشطفت من تعب اليوم وقولت اقلب شويه في الكمبيوتر علي الفيس ايه الجديد في النت ملقتش جديد وزهقت ودخلت نمت صحيت علي صوت قطه وقرأن الفجر

كان بيقرا قمت اتوضيت وصليت ورجعت نمت تاني صحيت الساعه ٦ علي صوت قطه تاني انا كنت مستغرب ايه الصوت ده وجاى منين لاني مش متعود اسمعه قولت اقوم

افطر والبس وأخرج علي الشغل وانا ماشي علي الشغل كنت حاسس باختلاف بإحساس افضل مش عارف ليه بس كنت متطمن علي غير العاده وروحت شغلي الناس كلها ولله الحمد

كانت بتحبني بس اكيد زى ما فيه ناس بتحب في ناس بتكره مكنتش حاطت في بالي الصراحه المهم في اليوم ده كان في واحد هقول عليه صاحبي كان بيبصلي بطريقه غريبه

علي غير العاده لحد ما جه وقالي المدير عاوزك قولتله ماشي وقت الرست علشان العهده والكاشير قالي لا عاوزك دلوقت وانا هقف مكانك مدتش خوانه وقولتله ماشي وسيبته

بس مكنتش مرتاح له ودخلت للمدير وبقوله حضرتك طلبتني قالي اه انا بعتلك سيد وده كان اسم صاحبي هو كان بيقول انك عامل مشكله علي الكاشير وأن كمان العهده بتاعتك

بتبقي ناقصه وانا مستغرب بأن دى مش عوايدك قولتله حضرتك محصلش وممكن تسأل اى حد من الناس اللي معانا وفجاه سمعنا صوت عالي جاى من بره فقالي طيب خلي

بالك وخرجنا بسرعه لبره لقينا الصوت جاى من عن مكنة الكاشير بتاعتي وسيد عمال يصرخ ويزعق فجريت عليه بقوله في ايه قالي بحط ايدي في الدرج اخد فلوس حاجه

خربشتني وفضلت تعمل كده كل ما احط ايدي وبصيت في الدرج ملقتش حاجه قولتله انت هتاخد فلوس ليه لقيته اتبرجل ورد عليا وقالي بفك فلوس للزبائن مع العلم

المجمل كان بيجوا بكريدت كارد وفيز قولتله ماشي استأذنك اقف مكاني وفضلت شغال والكلام ده كله بيدور في دماغي من اول المشكله اللي عملهالي سيد لحد اللي حصل معاه

وهو واقف مكاني وكمان الخربشه اللي كانت واضحه علي أيده فكبرت دماغي وكملت شغلي عادى لحد ما روحت وشوفت القطه تاني في نفس الشارع بس كان واضح انها مش جعانه المرادى لا دى

كانت كأنها بتشكرني عديت وقلتها الشكر لله وكملت طريقي وروحت نمت علي طول في الليله دى وصحيت علي صلاة الفجر تاني وصحيت صليت بس المرادى صليت في المسجد اللي جنب البيت وانا راجع…يتبع
الجزء الثاني من هنا